काठमाडौँ, १३ माघ : विश्वको दोस्रो ठुलो शिखर माउन्ट केटुको कीर्तिमानी सफल आरोहण गरेर नेपाल फर्किएका आरोहीहरूलाई सरकारले सम्मान गरेको छ ।
प्रधानमन्त्री निवास बालुवाटारमा आज आयोजित एक कार्यक्रममा प्रधानमन्त्री केपी शर्मा ओलीले आरोहीहरूलाई दोसल्ला र प्रमाण पत्रद्वारा सम्मान गर्नुभयो ।
कार्यक्रममा प्रधानमन्त्री ओलीले हिउँदे सिजनमा माउन्ट केटुको सफल आरोहण गरेर विश्व सामु नेपालको चिनारी र पहिचानलाई थप उँचो बनाउने काम प्रशंसा योग्य भएको बताउनुभयो ।
प्रधानमन्त्री ओलीले हिमाल आरोहण जो सुकैले गर्न नसक्ने भएकाले हिमाल आरोहण गर्नेहरूका लागि विशेष मानपदवी र विभूषण को व्यवस्था गरिने बताउनुभयो ।
प्रधानमन्त्री ओलीले हिमाल आरोहणमा जाँदा सरकारलाई जानकारी गराए सक्दो सहयोग गर्ने बताउनु हुँदै हिमाल आरोहण सावधानीपूर्वक गर्न पनि आह्वान गर्नुभयो ।
कार्यक्रममा केटु हिमाल आरोहीको नेतृत्व गर्नुभएका निर्मल पूर्जाले देशको चिनारीका लागि आफूहरूले हिमाल चढ्ने गरेको भए पनि कहीँ कतैबाट सहयोग नपाएको गुनासो व्यक्त गर्नुभयो ।
No comments:
Post a Comment