ओली हिटलरजस्तै बने, केही वर्षमै ओलीको अस्तित्व सकिन्छ : झलनाथ खनाल

काठमाडाैँ, २५ पुस : नेपाल कम्युनिस्ट पार्टी (नेकपा) प्रचण्ड–माधव समूहका वरिष्ठ नेता झलनाथ खनालले प्रधानमन्त्री केपी ओली हिटलरजस्तै तानाशाह भएको टिप्पणी गर्नुभएकाे छ । नेकपा सम्पर्क समन्वय कमिटीद्वारा शनिबार काठमाडौंमा आयोजित भेला तथा प्रशिक्षण कार्यक्रममा वरिष्ठ नेता खनालले जर्मनीमा समाजवादी पार्टीबाट हिटलर जन्मिएजस्तै नेपालमा कम्युनिस्ट पार्टीबाट केपी ओली जन्मिएको बताउनुभयाे ।

कहिलेकाहीँ पार्टीको गल्तीका कारण तानाशाहहरू जन्मिने गरेको र त्यसका विरुद्धमा फेरि संघर्ष गर्दै जानुपरेको उहाँले बताउनुभयाे । खनालले ओली समूहले धनगढीमा गरेको कार्यक्रमलाई पञ्चभेलाको संज्ञासमेत दिनुभयाे । 

विभिन्न नौवटा जिल्लाबाट बस रिजर्भ गरेर मान्छेहरूलाई पैसा दिएर गराएको भेला २०४६ अगाडि पञ्चहरूले गर्ने भेलाजस्तै भएको उहाँको भनाइ छ । २०४६ अगाडि पञ्चहरूले देशभर भेला गरेको र अहिले पनि ओलीले पञ्चभेला गर्दै हिँडेको खनालको दाबी छ । त्यसवेलाका पञ्चहरूको अहिले इतिहास मेटिएर गएजस्तै केही वर्षमै केपी ओलीको पनि अस्तित्व समाप्त हुने उहाँले दाबी गर्नुभयाे । 

कार्यक्रममा प्रवक्ता नारायणकाजी श्रेष्ठले प्रधानमन्त्री ओलीले चालेको असंवैधानिक प्रतिगामी कदम खारेज गरेर प्रतिनिधिसभा सुचारु गर्न नसके देशमा चुनाव पनि नहुने, संसद् पनि नहुने र देश प्रतिगमनतर्फ जाने बताउनुभयाे ।