पूर्वराजा ज्ञानेन्द्रको सन्देश- राजगद्दी त्यागेर उच्च साहस र इमानदारी दर्शाएँ

काठमाडाैँ, २७ पुस : पूर्वराजा ज्ञानेन्द्र शाहले राजगद्दी त्यागेर आफूले उच्च साहस र इमानदारी दर्शाएको बताउनुभएकाे छ । उहाँले अहिलेको राजनीति इमानदारी र जनहितमा आधारित नभएको गुनासो गर्नुभएकाे छ।

पृथ्वीजयन्तीका अवसरमा आइतबार दिनुभएको शुभकामना सन्देशमा पूर्वराजाले नेपाल निर्माणमा हरेक जातीय, भाषिक र सांस्कृतिक समुदायकाे विशिष्ट योगदानलाई समेत स्मरण गर्नुभयाे ।

‘यो समयमा हामी देश कसरी जोगाउन सकिएला भन्ने चिन्ताग्रस्त अवस्थामा छौंँ, हाल झापामा रहनुभएका पूर्वराजाले जारी सन्देशमा भन्नुभएकाे छ, ‘देशको आवश्यकता र जनताको चाहना हुँदा शाहवंशीय राजाहरूले सक्रिय भूमिका मात्र निर्वाह गरेका छैनन्, संवैधानिक राजतन्त्रको मर्यादाअनुरूप व्यवहार भएको छ र राजगद्दी त्याग्नेसम्मको उच्च साहस र इमान्दारी पनि दर्शाएका छन् । हाम्रा निम्ति देश र जनताको हित नै सर्वोपरी रहँदै आएको छ ।’ उहाँले जनचाहनाअनुसार शाह वंशले निर्णय लिँदै आएको जिकिर गर्दै अहिलेको व्यवस्थाप्रति असन्तुष्टि जनाउनुभयाे  । 

पूर्वराजाले राजनीति भन्नु नै देशसेवाको उच्चतम साधन रहेको उल्लेख गर्दै भन्नुभयाे, ‘अहिले मुलुकले व्यहोरेको राजनीति कति इमान्दार र राष्ट्रकेन्द्रित छ, कति जनहितअनुकूल छ त्यसको समीक्षा हुन अब विलम्ब भइसकेकाे छ ।’ उहाँले परिवर्तनका नाममा आफ्नो इतिहास, सभ्यता, धर्म, संस्कृति र एकता भत्काउँदै पराया इच्छा पूरा गर्ने अवाञ्छित क्रियाकलाप नेपालमा भित्रेकोसमेत आरोप लगाउनुभयाे । 

पूर्वराजा ज्ञानेन्द्रले संसारमा कतिपय देशमा जाति, भाषा र धर्मका नाममा परस्पर मतभेद उत्पत्ति भएको, तर नेपाल सबै जातीय, भाषिक र सांस्कृतिक सम्प्रदायको साझा प्रयासको उपज रहेको उल्लेख गर्नुभएकाे छ । 

उहाँले राष्ट्र निर्माता पृथ्वीनारायण शाहको मार्गदर्शन नेपालको अस्तित्व रक्षा, नेपालीको एकता र मुलुकको समृद्धि लक्षित भएको पनि उल्लेख गर्नुभएकाे छ ।  उहाँले राष्ट्रिय अखण्डताका लागि एकताको गाँठो बलियो पार्नुपर्नेसमेत बताउनुभयाे ।