काठमाडौँ, २२ असोज : बडादशैँमा शक्तिपीठमा बलि नहुने भएको छ । देवस्थलमा भीडभाड हुँदा कोरोना सङ्क्रमण बढ्ने अवस्था तथा अदालतको आदेशसमेत ध्यान दिएर राजगुठीले बलि स्थगित गरेकाे हो ।
राजगुठी अन्तर्गत देशमा दुुई हजार ३५० शक्तिपीठमा दोपाया तथा चौपायाको बलि स्थगित गरिएको गुठी संस्थानले जनाएको छ । गुठी संस्थानले मुख्य गरेर पाटन, भक्तपुर र काठमाडौँको तुलजा भवानी, भैरवनाथ भक्तपुर, देवी भगवती भिग्री प्यूठान, देवीस्थान सामरी नुवाकोट, देहीमाडौँ बैतडी, देवीमाई बारा, पाल्ही भगवती नवलपरासी, मष्टा भगवती जुम्ला लगायत काठमाडौँ उपत्यकाका भद्रकाली, दक्षिणकाली, गुह्येश्वरी लगायतका शक्तिपीठमा राँगा, बोका, हाँस र कुखुरा बलि दिइँदै आएको थियो ।
धनुषाको राजदेवीमा स्थानीय प्रशासनले हालै पशुबलि रोक्ने निर्णय गरिसकेको छ । योपल्ट हनुमान्ढोका दरबारस्थित दशैँघर र मूलचोकमा दिइने ५४ राँगा र ५४ बोकाको बलि पनि स्थगित गरिएको साविक कौसी तोसाखाना र हाल निवृत्तिभरण व्यवस्थापन कार्यालयका शाखा अधिकृत राजभाइ श्रेष्ठले जानकारी दिनुभयो ।
गुठी संस्थानका प्रवक्ता सरोज थपलियाका अनुसार सर्वोच्च अदालतले दोपाया, चौपाया बलि क्रमिक रूपमा घटाउँदै लैजान २०७३ साउन २० गते बिहीबार गरेको आदेश अनुसार यो कार्यान्वयनको अवस्थामा रहेको हो । तत्कालीन न्यायाधीशद्वय ईश्वरप्रसाद खतिवडा र अनिलकुमार सिन्हाको संयुक्त इजलासले सरकारका नाममा यो आदेश जारी गरेको थियो ।
No comments:
Post a Comment